Parlamenti Evropian ka vendosur vitin 2030 si afat kufi që Shqipëria të përmbushë kushtet e anëtarësimit, por nuk sqaron se çfarë ndodh nëse ky afat nuk zbatohet.

Komisioni i Jashtëm i Parlamentit Europian njoftoi të mërkurën se ka miratuar raportin vjetor për Shqipërinë ku është vendosur përcaktimi i vitit 2030 si kufi për arritjen e reformave që i nevojiten anëtarësimit.

"Vendimmarrësit të punojnë së bashku drejt përmbushjes së kritereve të anëtarësimit jo më vonë se 2030", thuhet në raport.

Për më tepër, PE në këtë raport kërkon edhe detyra shtesë, "kryerjen urgjente të reformës zgjedhore për zgjedhjet e ardhshme parlamentare".

Raporti për Shqipërinë u miratua me 52 vota pro, 5 kundër dhe 10 abstenime.

Eurodeputetët e Komisionit të Jashtëm vunë në dukje angazhimin e palëkundur të Shqipërisë për integrimin në BE, duke pohuar se ai është një reflektim i konsensusit mes partive politike dhe i mbështetjes dërrmuese të qytetarëve.

Megjithatë, eurodeputetët i kërkojnë qeverisë të intensifikojë përpjekjet në forcimin e funksionimit të shtetit të së drejtës, gjyqësorit, kundër korrupsionit dhe krimit të organizuar.

Po ashtu sipas raportit, vendi duhet të garantojë lirinë e medias duke shtruar detyrën e miratimit të një kuadri ligjor që mbron gazetarët, mbrojtësit e të drejtave të njeriut dhe palët e tjera të interesuara nga paditë strategjike kundër pjesëmarrjes publike. Dokumenti thekson se qeveria duhet të avancojë më tej axhendën e reformave të BE-së në bashkëpunim me opozitën dhe të gjitha segmentet e shoqërisë. Raporti dënon konfrontimin e qëndrueshëm politik, veprimet përçarëse dhe retorikën nxitëse nga politikanët dhe zyrtarët e nivelit të lartë, duke theksuar rëndësinë e ndërtimit të një kulture parlamentare konstruktive duke nxitur konsensusin midis të gjithë aktorëve politikë.

Eurodeputetët shprehin keqardhjen që partitë kryesore politike nuk arritën një marrëveshje për reformën zgjedhore dhe u bëjnë thirrje autoriteteve shqiptare që të zbatojnë urgjentisht ndryshimet e pazgjidhura në kuadrin e financimit të zgjedhjeve dhe partive, shumë përpara zgjedhjeve parlamentare të 2025-ës.

Po ashtu raporti thekson nevojën për përpjekje më të strukturuara dhe të qëndrueshme për të luftuar korrupsionin, përfshirë nivelet e larta, si dhe për të trajtuar kulturën e mosndëshkimit.

Eurodeputetët bëjnë thirrje për rezultate shtesë në luftën kundër krimit kibernetik, trafikimit të qenieve njerëzore dhe pastrimit të parave. Së fundi, eurodeputetët vënë në dukje se Shqipëria është shënjestruar shumë nga dezinformimi rus dhe sulme të tjera hibride dhe duhet të forcojë mbrojtjen e infrastrukturës së saj kritike, sigurinë kibernetike, kundër-dezinformimin dhe masat e tranzicionit energjetik.

Në Bruksel, pas miratimit të këtij raporti që për herë të parë përfshin afat konkret të kërkuar zyrtarisht, disa ekspertë të integrimit po vlerësojnë se ky përcaktim është demonstrim i planit për të futur Shqipërinë si anëtare me të drejta të plota të BE, midis viteve 2031-2034. /noa.al/