Një mëngjes terrori për një nënë të dy fëmijëve 4 vjeç dhe 11 muajsh, të cilët gjendeshin brenda një makine me motorin ndezur, e cila u vodh nga një person.
Gruaja e kishte lënë makinën ndezur teksa po i binte citofonit të shtëpisë së gjyshes së fëmijëve, ku do të linte vajzën e vogël, para se të çonte djalin në kopsht.
Por në pak çaste, një burrë hipi në makinë dhe u nis me shpejtësi, bashkë me dy fëmijët brenda. Ngjarja e rëndë ndodhi mëngjesin e kësaj të hëne në Spanjë, në zonën e Collado Villalba, provincë e Madrid.
Gruaja me origjinë afrikano-veriore, e kishte lënë ndezur makinën, në mënyrë që të ruante konstante ngrohjen brenda mjetit, teksa po i binte citofonit të nënës së të shoqit, pasi do linte vajzën dhe vetë do ikte në punë.
Makina ‘Seat Leon’ e zezë e vjedhur u largua me shpejtësi, për të ndaluar në parkimin e një supermarketi, jo shumë larg vendit të ngjarjes, shkruan noa.al.
Kjo pasi fëmija i madh nisi të qante. Kështu hajduti zbriti djalin bashkë me ndenjësen e vogëlushit, duke e lënë në parkim, për t’u arratisur më tej.
Pak orë më vonë mjeti u gjet i braktisur bashkë me foshnjën brenda në zonën e Fuenlabrada, rreth 50 kilometra larg vendit ku ndodhi ngjarja.
Fatmirësisht dy vogëlushët u gjetën shëndoshë e mirë, dhe u kthyen te nëna. /a.y/noa.al