Familja mbretërore në karantinë, anulohen takimet dhe mbrëmjet gala
Transmetuar më 25-03-2020, 18:35

Koronavirusi nuk është ndalur as tek familjet mbretërore. Pas Princit Albert të Monakos, edhe Princi Charles i Wales, rezultoi pozitiv dhe u izolua me bashkëshorten Kamila në shtëpinë e tyre në Skoci.

Për të shmangur përhapjen e infeksionit tek të tjerët, janë pezulluar udhëtimet, takimet, emërimet kombëtare, vizitat shtetërore, mbrëmjet gala dhe angazhimet e plnaifikuara. Edhe dasmat janë pezulluar, raporton AdnKronos.

Ndërsa shqetësimet për familjen mbretërore janë rritur këto ditë, thuhet se mbretëresha Elizabeth është në gjendje të mirë shëndetësore.

E mbyllur në kështjellën Windsor me këshilltarët e saj, Mbretëresha Elizabeth po jeton larg Princit Charles, të cilin e ka takuar para se ai të dianostikohej me koronavirus.

Nga kështjella, mbretëresha mbajti një fjalim të shkurtër për Anglinë duke thënë: ‘Shumë prej nesh do të duhet të gjejnë mënyra të reja për të qëndruar në kontakt me njëri-tjetrin dhe të sigurohen që të dashurit e tyre janë të sigurt. Edhe unë me familjen time jemi të gatshëm të bëjmë pjesën tonë.’

Edhe mbretëresha Margrethe e Danimarkës foli publikisht duke njoftuar anulimin e të gjitha festimeve, tani për tani, përfshirë ditëlindjen e 80-të.