Ndryshe nga herë të tjera ku policia ka hequr shumë patenta në aksin Tiranë-Elbasan, në zonën e Saukut, mbrëmjen e shkuar edhe pse qëndroi tre orë në pritje, nuk është konstatuar asnjë shkelje nga ana e drejtuesve të automjeteve.

Policia e Shtetit tha se asnjë shofer nuk ka ecur me shpejtësi mbi 100 km në orë. “Vërtet nuk u tërhoq asnjë leje drejtimi, por s’ka më mirë”, thuhet në reagim.

"Me Policinë Rrugore, me radar për të parandaluar aksidentet rrugore që shkaktohen si pasojë e shpejtësisë tej normave të lejuara."

"Për tre orë asnjë shpejtësi mbi 100 km/h, por janë evidentuar shpejtësi nga 93-98 km/h në këtë aks që më parë ishte vërtet problematik përsa i përket ngjarjeve rrugore, por monitorimi i pandërprerë me radar e Patrulla të Policisë Rrugore ka parandaluar në maksimum aksidentet në këtë rrugë".

"Vërtet nuk u tërhoq asnjë leje drejtimi, por s’ka më mirë".

"Sepse qëllimi jonë s’është të reklamojmë sa patenta heqim, qëllimi është të sensibilizojmë, për të parandaluar aksidentet rrugore".

"E kjo është mrekulli, pasi ndryshe nga mbrëmë ku dhe në fokusin e kamerës së një televizioni u evidentuan shpejtësi deri në 175 km/h, shpejtësi gati vrastare, sonte asnjë e tillë".

"Po vijojmë përditë e përnatë, pa asnjë ndërprerje, me të gjitha mjetet logjistike dhe kapacitetet në burime njerëzore që Policia Rrugore ka në dispozicion në të gjithë vendin, që viti 2020 të mbyllet me prioritet të realizuar, “VITI I SIGURISË RRUGORE”,  tha policia pas këtij fakti pozitiv.

/NOA.al