Përveç Kupës së Botës, përveç sportit, përveç ëndrrave të fëmijëve; futbollistët e Iranit po jetojnë një makth, të dërrmuar mes vullnetit për të mbështetur protestat që kanë vazhduar prej javësh në vendin e Lindjes së Mesme kundër regjimit të Ajatollahut, siç sugjerohet nga shpirti dhe zemra, dhe frika se veprimet e tyre, gjestet e bëra në mënyrë të habitshme në sytë e botës, mund të kenë pasoja të tmerrshme jo vetëm për ata, por edhe për familjet e tyre.
Nuk kaloi shumë kohë për të kuptuar se çfarë fshihej pas ndryshimit të papritur të kursit të skuadrës iraniane mes ndeshjes hapëse kundër Anglisë, në të cilën lojtarët nuk kënduan himnin kombëtar, duke u bërë njësh me tifozët dhe njerëzit që protestuan në shtëpi pas vrasjes së të resë Mahsa Amini, dhe “gatitu” në vijim me Uellsin, kur në vend të kësaj ata kishin vendosur ta këndonin himnin.
Mjaftoi të shihje sytë e tyre të tmerruar, ndërkohë që kamera i rishikonte një nga një, për të kuptuar dramën që po ndodhte në Katar dhe gati dy mijë kilometra larg në Iran. Tani konfirmimi vjen nga një burim i përfshirë në sigurinë e Kupës së Botës, i cili ka zbuluar për CNN në cilin skenar, në mes të një historie spiune dhe një filmi horror, gjenden Azmoun, Tamiri & CO. Sipas burimit në fjalë, pas refuzimit të lojtarëve iranianë për të kënduar himnin në ndeshjen kundër Anglisë më 21 nëntor, skuadra është thirrur për një takim me pjesëtarët e Gardës Revolucionare të Iranit.
Atyre iu tha me atë rast se familjet e tyre do të përballeshin me "dhunën dhe torturën" nëse nuk këndonin himnin kombëtar, ose i bashkoheshin ndonjë proteste politike kundër qeverisë në Teheran. Me një thikë kaq të mprehtë në fyt, ishte e pashmangshme të mos përkuleshin para vullnetit të regjimit, ndaj kënduan himnin kundër Uellsit. I njëjti kërcënim për të arrestuar të dashurit e tyre në shtëpi dhe për t’ua nënshtruar torturave u bë edhe sot, nëse lojtarët nuk sillen si duhet para ndeshjes kundër SHBA.
Burimi nga Katari, i cili po monitoron nga afër agjencitë iraniane të sigurisë që veprojnë në Katar gjatë Kupës së Botës, tha se dhjetëra oficerë nga Garda Revolucionare Islamike e Iranit (organi ushtarak më i fuqishëm i regjimit besnik vetëm ndaj ajatollahëve) u rekrutuan për të monitoruar lojtarët e ekipit kombëtar, të cilët nuk lejohen të shoqërohen me të huaj. "Ka një numër të madh agjentësh iranianë të sigurisë në Katar që mbledhin informacion dhe spiunojnë lojtarët", – tha burimi.
Nga ky kontroll i mundimshëm nuk u përjashtua as trajneri Carlos Queiroz, i cili u takua veçmas me agjentët iranianë pas kërcënimeve ndaj lojtarëve dhe familjeve të tyre. Burimi gjithashtu nuk ka treguar se cila ishte përmbajtja e kësaj bisede. Më parë lojtarëve iu ishin premtuar “dhurata dhe makina” para ndeshjes kundër Anglisë, por regjimi pasi u poshtërua në botë kishte ndryshuar në mënyrë drastike qasje, duke vazhduar të kërcënonte lojtarët dhe familjet e tyre. Në të gjitha këto peripeci, kombëtarja iraniane është ende në garë për kualifikimin në 1/8 finale të Botërorit, duke qenë se fitorja ndaj Uellsit erdhi pas disfatës së rëndë ndaj anglezëve.
Ndeshja e sotme ndaj SHBA premton të jetë shumë e nxehtë, duke qenë se amerikanët po luajnë gjithashtu për kualifikim (kanë një pikë më pak në renditje). Në tavolinë, në mes tensionesh në të cilat duket vërtet e pamundur të mos shtypesh, është edhe ftohja e marrëdhënieve mes dy qeverive, e dëshmuar nga kërkesa e freskët e Iranit për të përjashtuar ekipin kombëtar të SHBA-së nga Kupa e Botës për publikimin në llogaritë e veta sociale të një flamuri iranian pa stemë islamike.