Ndahet nga jeta para kohe prokurori i Elbasanit, Durim Bedini.
Këshilli i Lartë i Prokurorisë njofton ndarjen nga jeta të prokurorit të Prokurorisë Elbasanit, Durim Bedini.
Prokurori ka ndërruar jetë mbrëmjen e sotme pas një komplikacioni akut shëndetësor, informon KLP duke shprehur ngushëllimet e përzemërta nga gjithë anëtarët e Këshillit për bashkëshorten dhe gjithë rrethin e tij familjar.
Bedini ishte një prokuror karriere me një eksperiencë të gjatë në disa prokurori të Republikës.
Ai ka qenë Kryeprokuror i Prokurorisë së Elbasanit për disa vite. Më pas u transferua drejtues i Prokurorisë në Kavajë.
Bedini u konfirmua në detyrë në tetor të vitit të shkuar gjatë procesit të vettingut ndaj tij. Bedini mori vlerësim pozitiv për pastërtinë e figures, si dhe nuk u evidentuan probleme domethënëse në kriterin profesional. Durim Bedini e ka nisur karrierën në sistemin e drejtësisë si prokuror në vitin 1995. Në vitin 2008 ai u transferua nga Elbasani në Kavajë, ku ka mbajtur dhe pozicionin e drejtuesit. Pas miratimit të hartës së re gjyqësore dhe bashkimit të Prokurorisë së Kavajës me atë të Durrësit, Bedini u rikthye sërish në Elbasan, ku dhe e vijon detyrën.
Bashkohu me kanalin e NOA WhatsApp për lajmet më të fundit direkt në celularin tënd