Maskat e fytyrës nuk do të jenë të detyrueshme në aeroportet dhe fluturimet në Evropë nga 16 maji, bëri sot të ditur Agjencia Evropiane e Sigurisë së Aviacionit dhe Qendra Evropiane për Parandalimin dhe Kontrollin e Sëmundjeve.

Në deklaratë theksohet se Bashkimi Evropian nuk do të rekomandojë më veshjen e maskave mjekësore në aeroporte dhe aeroplanë duke filluar nga java e ardhshme.

Sidoqoftë, ECDPC kërkon që pasagjerët të sillen me përgjegjësi dhe të respektojnë zgjedhjet e të tjerëve rreth tyre. Kurse shton se maska ​​mbetet një nga mbrojtjet më të mira kundër transmetimit të Covid-19.

“Pasagjerët sidoqoftë duhet të sillen me përgjegjësi dhe të respektojnë zgjedhjet e të tjerëve rreth tyre”, tha Drejtori Ekzekutiv i EASA, Patrick Ky. “Dhe një pasagjer që kollitet dhe teshtin duhet të mendojë fuqimisht të mbajë një maskë për fytyrën, për të siguruar sigurinë e atyre që ulen aty pranë.”

Agjencia e Sigurisë së Aviacionit të Bashkimit Evropian tha se shpresonte se vendimi i përbashkët, i marrë me Qendrën Evropiane për Parandalimin dhe Kontrollin e Sëmundjeve, do të shënojë "një hap të madh përpara në normalizimin e udhëtimit ajror" për pasagjerët dhe ekuipazhet.

"Për pasagjerët dhe ekuipazhet, ky është një hap i madh drejt normalizimit të udhëtimit ajror", thuhet në deklaratë.

Ndërsa rekomandimet e reja hyjnë në fuqi më 16 maj, rregullat për maskat mund të ndryshojnë nëse linjat ajrore fluturojnë drejt ose nga destinacionet ku rregullat janë të ndryshme.

Drejtori i Qendrës Evropiane për Parandalimin dhe Kontrollin e Sëmundjeve, Andrea Ammon tha se larja e duarve dhe distancimi social duhet të praktikohet ende, por operatorët e aeroportit këshillohen të mos vendosin kërkesa distancimi nëse këto ka të ngjarë të çojnë në një pengesë apo kaos aeroportual. /noa.al