Orkestra Simfonike e Rebetikos në bashkëpunim me Operën Kombëtare Greke dhe Teatrin Kombëtar të Operës dhe Baletit Shqiptar performuan një simfoni të përpunuar dhe sjellë nga Yannis Belonis.

Mbrëmë ora 19.00 në Teatrin Kombëtar të Operës dhe Baletit, Symphonic Rebetiko performoi në kuadrin e Javës së Kulturës Greke 2022.

Kjo orkestër është duartrokitur, teksa performonte virtualisht kur e gjithë bota e shijonte artin nga shtëpia.

Instrumentistët grekë, në kohën më të ashpër të kovidit bënë bashkë 54 muzikantë nga 11 vende të botës për të performuar live në emër të jetës.

Ambasada Greke i ka sjellë edhe më herët në Shqipëri këta muzikantë. Për ata që kanë mundur ta shijojnë muzikën e tyre në sheshin kryesor të qytetit të Korçës, pranë Katedrales dhe nën shkëlqimin e hënës e dinë shumë mirë se përvoja që patën në MIK FESTIVAL ishte po aq magjike edhe në sheshin Skënderbej.

Orkestra Symphonic Rebetiko interpretoi më të mirat e repertorit të vet në kuadër të transmetimit të vlerave kulturore nga vendi fqinj.

Ata thanë se kishin një mision, për të përcjellë magjinë që kanë trashëguar nga tradita muzikore greke e Smirnit dhe Konstandinopojës ndër vite.

Për këtë veçanti e për këtë origjinalitet që e ruajnë përmes muzikës që interpretojnë ngado në botë, orkestra Symphonic Rebetikoështë mes Përfaqësuese të Trashëgimisë Kulturore Jomateriale të Njerëzimit të UNESCO-s. /noa.al