Tiranë, 29 korrik, NOA, Rajmonda Lajthia - Banka e
Shqipërisë ishte e vonuar në vendimarrjen e saj për të ulur normën e interesit
për lekun.
Por jo vetëm. Një ulje e tillë është një veprim rutinë, i cili nuk do të ketë efektin e parashikuar, siç është shtimi i kreditimit, si dhe një lehtësim sadopak të këstit të kredive në lekë.
I këtij mendimi është ish- guvernatori i Bankës, Shkëlqim Cani, sipas të cilit lehtësimi i politikës monetare është një veprim tipik në kohë krize dhe se erdhi pas presionit të qeverisë.
“Ne të gjithë e mbajmë mend presionin që qeveria bëri në drejtim të politikës monetare, ndaj jam i mendimit se një vendim i tillë është marrë nën presion”- u shpreh Cani.
Sipas tij, një vendim i tillë është i vonuar.
“Nëse do të ishte marrë një vendim i tillë gati dy vjet më parë, normat e interesit për bonot e thesarit, për kreditë, por edhe kostot në buxhet nuk do të ishin kaq të larta”. Mbi të gjitha, vijon më tej argumentin z. Cani, një vendim i tillë është rutinë, pasi ulja është aq e vogël sa nuk do të jetë e ndjeshme, për kosumatorin, si për biznesin edhe për qytetarin.
Një ditë më parë Banka e Shqipërisë uli koston e parasë me 0.25%, si një masë kjo, e cila do të ndikojë në rritjen e konsumit në vend, në kushtet kur inflacioni është nën kontroll dhe nuk përbën kërcënim.
r.l/NOA
| Komente |
|
