Transmetuar më 28-09-2017, 16:54
Publicitet

Kryeministri shqiptar E di Rama replikon në distancë me ish-kryetarin e Lëvizjes Vetëvendosje në Kosovë, Albin Kurti.

Kjo pasi Albin Kurti, kundërshton propozimin e kreut të qeverisë shqiptare, që Kryeministri i Kosovës, Ramush Haradinaj të ndryshojë qëndrim për çështjen e demarkacionit të kufirit me Malin e Zi.

“I dashur Albin! Faktet s’janë opinione dhe kufijtë nuk përcaktohen me opinione! Sa për tokën po ta kujtoj që unë nuk fal as det e jo më tokë”, shkruan Rama në Twitter.

Më herët Kurti bëri këtë publikim mediatik:

“E kemi mirëpritur qeverinë e re nga Partia Socialiste dhe z.Edi Rama, sepse kemi shpresuar që kjo qeveri do të angazhohet që mes Republikës së Kosovës dhe Republikës së Shqipërisë, të krijohet një treg i përbashkët i mallrave dhe shërbimeve, një treg i unifikuar energjetik, një politikë e jashtme e bashkërenduar dhe e njësuar, një bashkëpunim edhe më i afërt në sektorin e sigurisë, si dhe një thellim i gjithanshëm i bashkëpunimit nga arsimi te shëndetësia dhe nga kultura te sporti.

Por, ndërkohë që përparimet në këtë aspekt janë tepër të ngadalta, e më shpesh ceremoniale se sa përmbajtësore, ne dëgjuam se z. Rama po i kërkon z. Haradinaj, kryeministrit aktual të Kosovës, që të ndërrojë qëndrim për demarkacionin me Malin e Zi.

Z. Rama pra po kërkon që, kundër asaj që dëshmohet në harta, në dokumente zyrtare, nga profesionistët ekspertë, në mbamendje institucionale, në kujtesë popullore dhe me peticionin masiv qytetar, të përkrahet një marrëveshje e padrejtë që ia heq Kosovës 8.200 hektarë të territorit.” /a.y/noa.al

Loading...