Transmetuar më 19-04-2018, 20:24

Njihet si një “grua e hekurt” e politikës shqiptare, por duket se edhe ajo ka një pikë të dobët.

Deputetja e Partisë Socialiste Mimi Kodheli nuk i ka përmbajtur dot lotët në studion e emisionit “Rudina”, teksa i lexuan LIVE pjesë nga ditari i babait të saj.

Ajo dëgjoi fjalët e ndjera të babait për ditën kur Mimi erdhi në jetë.

“Kujto, gjithmonë kujto se jeta është një luftë në të cilën fiton herët a vonë ai që është i ndershëm, i drejtë dhe punëtor”, ishin fjalët me të cilat babai i Kodhelit mbyllte faqen e parë të ditarit kushtuar të bijës.

Pas këtyre momenteve emocionuese, deputetja ka folur për lidhjen e veçantë me babain e saj. Ajo thotë se ka pasur një lidhje mjaft të veçantë dhe se vizioni I tij ka ndikuar tek ajo që është sot deputetja.

“Babai im ishte një djalë shumë vizionar dhe mendjehapur edhe pse jetonte në një epokë të vështirë. Unë kam patur një lidhje shumë të veçantë me të edhe ajo gjë që s’mund të kaloj pa u vënë re është ajo që ai thotë në fund: ‘Kujto, gjithmonë kujto se jeta është një luftë në të cilën fiton herët a vonë ai që është i ndershëm i drejtë dhe punëtor’. Kjo është edukata që familja më ka dhënë. Kërkoj ndjesë për prekjen, por ai është larguar herët nga jeta dhe nuk mund të mos mallëngjehem sa herë bëhet fjalë për të. Ai është larguar në moshën 54-vjeçare, në atë kohë unë e kam patur djalin 4 muajsh dhe ai sot është 28 vjeç. Edhe pse nuk është më, ai rri tek unë çdo ditë, fle tek unë çdo ditë dhe më korrigjon kur gaboj dhe është gjithmonë drita jeshile në tunelin ku unë futem. Ai është drita ime dhe ka ndikuar në shumëçka unë jam. Edukata që më kanë dhënë ma ka bërë më të thjeshtë jetën dhe karrierën dhe më duhet të jem falënderuese deri në vdekje atij dhe mamasë time”, tha Kodheli./a.m./noa.al/