Çfarë duhet të dini:

●Miokarditi dhe tromboza, rreziqet reale të vaksinës Covid në një studim me 99 milionë njerëz të vaksinuar të cilët janë përfshirë në studimin më të madh global të sigurisë së vaksinave anti covid dhe rezulton se ato kanë ndikim negativ që lidhet me sëmundje fatale

●Studimi që përfshiu pothuajse 100 milionë njerëz të vaksinuar për Covid-19 ka sjellë fakte që hedhin dritë mbi rreziqet potenciale të vaksinave. Ai ka zbuluar lidhjet e mundshme me miokarditin, perikarditin, trombozën dhe reagimet e tjera të papritura të lidhura me vaksinën që shumë njerëz morën gjatë pandemisë

●Një studim i madh që përfshin pothuajse 100 milionë njerëz të vaksinuar kundër Covid ka hedhur më shumë dritë mbi rreziqet e mundshme të vaksinave.

●Ja çfarë u zbulua rreth miokarditit, perikarditit, trombozës dhe reaksioneve të tjera negative të lidhura me vaksinën që shumë njerëz morën gjatë pandemisë.

●Del se rreth 20 milionë njerëz shpëtuan nga vdekja, por miliona më shumë po vuajnë telashe serioze me shëndetin

Gjatë pandemisë COVID-19 dhe më pas, efektet anësore dhe reagimet e padëshiruara të shkaktuara nga vaksina janë debatuar dhe po debatohen gjerësisht, duke u ndjekur edhe nga shumë teori konspirative që i mëshonin narrativës novax. Edhe sot, shumë meme po qarkullojnë në internet – veçanërisht në rrjetet sociale – me informacione të shumta që pretendojnë mbi "pasojat" e vaksinimit.

Përtej polemikave, ekspertët e epidemiologjisë kanë vazhduar të vlerësojnë tërësisht (dhe vazhdojnë ta bëjnë) ndikimin e vaksinave kundër përhapjes së koronavirusit SARS-CoV-2 ndër vite. Shkencëtarët po punojnë për të përcaktuar se cilat janë përfitimet nga vaksina, por edhe cilat janë kostot që po marrin njerëzit prej saj, raporton noa.al.

Një studim i ri, më i madhi i kryer ndonjëherë për sigurinë e këtyre vaksinave, ka nxjerrë në pah incidencën e ngjarjeve të padëshiruara si tromboza, perikarditi, miokarditi dhe gjendje të tjera që janë analizuar në më shumë se 99 milionë individë pasi ata ishin vaksinuar. Kështu, nuk ka nevojë më të bëhen meme konspirative sepse fakti po pranohet shkencërisht.

Në studim u analizuan të dhëna nga bazat e të dhënave kombëtare ose rajonale të kujdesit shëndetësor që mbulojnë 197 milionë njerëz nga Evropa, Azia, Amerika Veriore dhe Jugore dhe Oqeania.

Përpara se të thellohemi në rezultatet padyshim interesante, është e nevojshme të bëhet një kujtesë se çfarë kanë përfaqësuar këto vaksina në luftën kundër një patogjeni që, deri më sot, ka vrarë (zyrtarisht) rreth 7 milionë njerëz.

Vaksinat kundër Covid janë vlerësuar si të sigurta dhe efektive nga provat klinike të thelluara dhe për këtë arsye organet kryesore rregullatore të shëndetit – si FDA në Shtetet e Bashkuara dhe EMA në Evropë – i kanë miratuar ato për të luftuar pandeminë Covid-19.

Bindja është se në sajë të këtyre vaksinave, dhjetëra milionë viktima janë parandaluar dhe kemi arritur të dalim nga faza më kritike e valëve të kovidit që si pandemi zgjati të paktën tre vjet me lockdown dhe masa të tjera drakoniane.

Bazuar në studimin "Ndikimi global i vitit të parë të vaksinimit COVID-19: një studim modelimi matematikor" i publikuar në revistën shkencore autoritare The Lancet Infectious Diseases, vetëm në vitin 2021, vaksinat shmangën 20 milionë vdekje në total në mbarë botën.

Sipas një ekipi epidemiologësh nga Organizata Botërore e Shëndetësisë (OBSH), që nga viti 2020, miliona evropianëve mbi 60 vjeç u është shpëtuar jeta prej vaksinave kundër Covid.

Ky hulumtim tregon qartë efektivitetin ekstrem të vaksinave kundër infeksionit të koronavirusit SARS-CoV-2, por si me çdo ilaç tjetër nuk ka rrezik zero. Në fakt, miratimi për përdorim i një ilaçi është gjithmonë i lidhur me një ekuilibër delikat midis kostove dhe përfitimeve. Pikërisht për këtë arsye survejimi i barnave dhe vaksinave është thelbësor edhe pasi ato janë hedhur në treg, nëpërmjet atyre që quhen studime të Fazës 4.

Pasi ka kaluar një periudhë që nga marrja e vaksinave, studiuesit thonë se tani janë në gjendje të tregojnë më qartë incidencën e çdo efekti anësor dhe reaksioni negativ, në sajë të numrit të madh të njerëzve të përfshirë. Është analizuar ecuria shëndetësore e afro 100 milionë njerëzve duke shqyrtuar skedat e tyre pas vaksinimit duke përfshirë vizitat, kontrollet dhe shënimet e mbajtura nga mjekët.

Këtë e bëri Rrjeti Global i të Dhënave të Vaksinave (GVDN), i cili përmes projektit Global COVID Vaccine Safety (GcoVS) vlerësoi tërësisht shkallët e incidencës së 13 gjendjeve (kardiake, gjaku dhe neurologjike) duke krahasuar ato të shfaqura pas vaksinimit dhe ato në mungesë të vaksinës. Me fjalë të tjera, ata vlerësuan se sa e rritën vaksinat rrezikun e kushteve të ekzaminuara, duke kërkuar për ato që epidemiologët i quajnë sinjale sigurie.

Studimi identifikoi sinjalet e paracaktuara të sigurisë për miokarditin (inflamacion të muskulit të zemrës) dhe perikarditin (inflamacion të qeses së hollë që mbulon zemrën) pas vaksinave mRNA, sindromën Guillain-Barré (dobësi muskulore dhe ndjesi (ndjesi) e ndryshuar), si dhe trombozën e sinusit venoz cerebral (lloji i mpiksjes së gjakut në tru) pas vaksinave të vektorit viral.

Efektet e padëshiruara të analizuara në studimin vëzhgues, i cili përfshiu afro 100 milionë njerëz të vaksinuar nga tetë vende të botës, përfshinin sëmundje si miokarditi; perikarditi; sindromi Guillain-Barré; tromboza e sinusit venoz cerebral; encefalomieliti akut i diseminuar dhe të tjerë.

Për shembull, 190 raste të sindromës Guillain-Barré u regjistruan në njerëz që morën një vaksinë kundër covid, krahasuar me 66 që ishin pa vaksinim, ose tre herë më shumë njerëz të vaksinuar rezultuan të prekur nga sindroma.

Për sa i përket trombozës së sinusit venoz cerebral, pas dozës së parë të vaksinës së vektorit viral, studiuesit vunë re një rrezik më shumë se 3 herë më të lartë se sa pritej (69 raste kundrejt 21 të pritshme). Rreziku i kësaj gjendje u rrit me 1.5 herë pas një vaksine mRNA dhe 1.25 herë pas dozës së dytë.

Encefalomieliti akut tregoi një raport të rasteve të vëzhguara ndaj rasteve të pritshme me rritje pas dozës së parë të një vaksine mRNA, 7 raste të zbuluara kundrejt 2 të pritshme.

Perikarditi dhe miokarditi u rritën me të dy llojet e vaksinimit. Me një vaksinë mRNA, rreziku i perikarditit shkoi nga 1.74 herë pas dozës së parë duke u rritur në 2.64 herë pas dozës së katërt.

Për miokarditin, rreziku u rrit nga 3.48 herë pas dozës së parë në 6.10 pas të dytës me të njëjtën vaksinë mRNA. Këto janë të dhëna statistikisht domethënëse, siç theksohet me të kuqe në tabelat e studimit.

Siç shpjegohet në një deklaratë për shtyp nga shkencëtarët në Universitetin e Auckland që morën pjesë në hetim, analizat u kryen për të krahasuar pritshmëritë e zakonshme me ato pas vaksinimit për të zbuluar efektet anësore dhe sigurinë e vaksinave.

"Duke i vënë në dispozicion publikisht panelet e të dhënave, ne jemi në gjendje të ofrojmë transparencë më të madhe dhe komunikime më të forta me sektorin shëndetësor dhe publikun", tha Profesore e asociuar Helen Petousis-Harris, në Universitetin e Auckland, bashkëdrejtore në Rrjetin Global të të Dhënave të Vaksinave.

Në rastin e vaksinave kundër Covid, u shfaqën lidhje të rëndësishme me disa nga 13 sëmundjet e ekzaminuara.

Kështu për mielitin transversal (inflamacion i një pjese të palcës kurrizore) pas vaksinave të vektorit viral u identifikua si efekt anësor i vaksinës.

E njëjta gjë ndodhi dhe me encefalomielitin akut të shpërndarë (inflamacion dhe ënjtje në tru dhe palcë kurrizore), të cilat gjithashtu u identifikuan pas vaksinimit me vaksina të vektorit viral dhe mRNA.

“Madhësia e popullsisë në këtë studim rriti mundësinë e identifikimit të efekteve anësore të vaksinave", tha profesoresha Kristýna Faksová nga Departamenti i Kërkimeve Epidemiologjike në Institutin e Serumit Statens në Kopenhagë, Danimarkë, e cila drejtoi studimin.

Këto të dhëna janë të vlefshme jo vetëm për mbikëqyrje, por edhe për komunikim transparent me publikun që të jetë në dijeni të rreziqeve aktuale të vaksinimit, shtoi ajo.

Analizimi i morisë së të dhënave po bëhet për të zbuluar efektet anësore të vaksinës tek njerëzit që kanë marrë nga një deri në katër doza, duke ekzaminuar nëse ekziston një rrezik më i madh për zhvillimin e një problemi mjekësor në periudha të ndryshme kohore pas marrjes së vaksinës dhe duke krahasuar faktet me periudhat përpara se vaksina të bëhej e disponueshme.

Deri më sot, siç tregohet nga Ourworldindata, janë administruar 13.57 miliardë doza të vaksinës Covid dhe 70.6 përqind e popullsisë së botës ka marrë të paktën një.

Detajet e hulumtimit “Vaksinat e COVID-19 dhe efektet e padëshiruara: Një studim grupor shumëkombësh i Rrjetit Global të të Dhënave të Vaksinave (GVDN) i 99 milionë individëve të vaksinuar” u botuan në revistën shkencore Vaccine. /noa.al