Arturo Vidal, lojtari aktual i Colo-Colo, i është përgjigjur një pyetësori të "TNT Sports", në të cilin ka zbuluar klubin për të cilin do të kishte dashur të luante në karrierën e tij. Më tej, ai ka rrëfyer se cili është ekipi më i vështirë me të cilin është përballur dhe ka zgjedhur disa bashkëlojtarë me të cilët ka ndarë dhomën e zhveshjes.
Mesfushori kilian ka luajtur për klubet më të mira në botë, përfshirë Juventusin, Bayernin, Barçën dhe Interin. Megjithatë, ai la disa deklarata befasuese, kur u pyet për ekipin ku do të kishte dashur të luante: “Mund të ishte Real Madridi”.
Vidal ishte afër nënshkrimit për "Los Blancos" në verën e vitit 2015, pas largimit nga Juventusi. Kiliani pati disa polemika me skuadrën e bardhë që nga koha e tij te Bayern Munich, veçanërisht pas përballjes çerekfinale të Ligës së Kampionëve në vitin 2017.
Mesfushori u përjashtua nga fusha me karton të kuq në pjesën e parë dhe pas ndeshjes (dhe eliminimit të skuadrës së tij në kohën shtesë), denoncoi: “Kjo ishte vjedhje, nuk mund të ndodhë në Champions League”.
Më vonë, Vidal nënshkroi për Barcelonën dhe përjetoi ndeshjen e rivalitetit maksimal me Real Madridin. Kiliani ishte pikërisht shënuesi i golit të pestë në "El Clasico" e tij të parë: 5-1 në "Camp Nou".
Barça është, nga ana tjetër, skuadra më e vështirë me të cilën është përballur: “Skuadra më e vështirë ishte Barcelona në vitin 2015. Ajo na mundi në finalen e Champions League”.
Kiliani iu përgjigj edhe kurioziteteve të tjera për futbollistët. Ai e konsideron Leo Messin "lojtarin më të talentuar me të cilin ka luajtur" dhe Frank Ribery "lojtarin që e ka bërë të qeshë më shumë".
Bashkohu me kanalin e NOA WhatsApp për lajmet më të fundit direkt në celularin tënd